Fransada genişmiqyaslı meşə yanğınlarının söndürülməsi işlərinə 1 500 hərbçi cəlb olunub.
Fransanın müdafiə naziri Katrin Votren bildirib ki, hərbçilər ölkənin cənub-qərbində yanğınlarla mübarizə aparır. Mühəndis qoşunları alovun yayılmasının qarşısını almaq üçün xüsusi maneələr yaradır, əməliyyatlarda helikopter və dronlardan da istifadə olunur.
Məlumata görə, Fransa və İspaniyada davam edən yanğınlar səbəbindən 300 mindən çox insan təxliyə edilib. Fransada indiyədək 42 min hektar ərazi yanıb. Ən böyük yanğınlardan biri Jironda departamentində qeydə alınıb və burada 20 minə yaxın sakin təhlükəsiz ərazilərə köçürülüb.
Hadisə ilə əlaqədar Fransa Prezidenti Emmanuel Makron Daxili İşlər Nazirliyində böhran müşavirəsi keçirib.
