Fransada oktyabrın 24-də keçirilməsi planlaşdırılan kütləvi etiraz aksiyaları ilə əlaqədar 70 min polis və jandarmın cəlb edilməsi nəzərdə tutulur.
Etirazlara qiymət artımına qarşı çıxış edən “Sarı jiletlilər” hərəkatı da qoşulmağa çağırıb. Təşkilatçılar qarşıdakı aksiyaları “ikinci akt” adlandırıblar.
Fransanın daxili işlər naziri Loran Nünyes bildirib ki, ictimai asayişi təmin etmək üçün oktyabrın 17-də keçirilən və iğtişaşlarla, polis ilə toqquşmalarla müşayiət olunan aksiyalarla müqayisədə 20 faiz daha çox hüquq-mühafizə əməkdaşı cəlb ediləcək.
Zərurət yaranarsa, təhlükəsizlik qüvvələri 15 su şırnağından istifadə edə biləcəklər. Əməliyyatlara xüsusi təyinatlı bölmələr də cəlb olunacaq.
Fransa Prezidenti Emmanuel Makron daha əvvəl oktyabrın 24-də yalnız həmkarlar ittifaqlarının təşkil etdiyi nümayişlərə icazə veriləcəyini bildirmişdi.
“Ümumi tövsiyə ondan ibarətdir ki, yaxın günlərdə nümayişlər keçirilməsin. Söhbət aksiyaları davam etdirmək istəyən həmkarlar ittifaqı təşkilatlarından gedirsə, onlara alternativ marşrutlar təklif ediləcək. Əgər təşkilatçılar həmkarlar ittifaqları deyilsə, o zaman mümkün olan hər yerdə nümayişlər qadağan ediləcək”, – Makron qeyd edib.
İğtişaş təhlükəsi ilə əlaqədar şənbə günü Parisdə Luvr, Orse və Pikasso muzeyləri, eləcə də Böyük saray bağlanacaq.
