Fövqəladə Hallar Nazirliyi (FHN) yaxın günlərdə gözlənilən yağıntılı və qeyri-sabit hava şəraiti ilə əlaqədar əhaliyə müraciət edib.
Bildirilib ki, bəzi ərazilərdə intensiv yağış yağacağı, dağ çaylarından qısamüddətli sel keçəcəyi, şimşək çaxacağı və güclü külək əsəcəyi proqnozlaşdırılır.
FHN vətəndaşlara sel və daşqın təhlükəsi olan ərazilərdən uzaq durmağı, təhlükə yaranacağı halda yüksək əraziyə çəkilməyi tövsiyə edib. Küləkli havada dənizə girməmək, kiçikhəcmli gəmilərlə dənizə çıxmamaq, reklam lövhələri, elektrik dirəkləri və hündür ağacların yaxınlığında dayanmamaq da tövsiyələr sırasındadır.
Nazirlik, həmçinin ildırım zamanı elektrik cihazlarını şəbəkədən ayırmağı, açıq ərazilərdə təhlükəli obyektlərdən uzaq durmağı və avtomobildə olanlara təhlükə sovuşana qədər nəqliyyat vasitəsini tərk etməməyi məsləhət görüb.
