Bu il Azərbaycanda 125 mindən çox uşaq birinci sinfə qədəm qoyur.
Bu barədə elm və təhsil naziri Emin Əmrullayev Bilik Günü münasibətilə Bakı şəhəri Yasamal rayonu 21 nömrəli tam orta məktəbdə çıxışı zamanı danışıb.
“Bu da o deməkdir ki, 125 min şəxs həyatında yeni bir mərhələyə keçir. Bizim hər birimiz üçün məktəb həyatı, orada öyrəndiklərimizin əhəmiyyəti hər kəsə məlumdur”, – nazir deyib.
Emin Əmrullayev şagirdlərin qarşısında duran əsas vəzifələrdən də danışıb:
“Yaxşı şagird olmaqla bərabər yaxşı insan olmaq üçün də çalışmaq bu vəzifələrdən biridir”.
Nazir valideynlərin də təhsil prosesində rolunu vurğulayıb:
“Yeni tədris ilinin başlaması onlar üçün də bir məsuliyyətdir və onlar müəllimlərin yanında olsalar, birlikdə çalışsalar, daha böyük uğurlar əldə ediləcək”.
Emin Əmrullayev bildirib ki, bu il birinci sinfə gələn uşaqların 90 faizdən çoxu məktəbəqədər hazırlıqdan keçib:
“Bu da çox vacib göstəricidir. Yəni məktəbə gələn uşaqların əksəriyyəti heç olmasa bir il məktəbəqədər hazırlıqdan gəlir. İnanıram ki, bu onların təhsil nəticələrinə təsir edəcək və ölkənin də təhsilini irəli aparacaq”.
Nazir təmayüllü siniflərin də bu il daha geniş tətbiq olunacağını bildirib:
“Əvvəl təmayül sinifləri 14 məktəbi əhatə edirdi. Biz inanırıq ki, bu model faydalıdır. Çünki həm şagirdlərin ehtiyaclarını nəzərə alır, həm də müəyyən mənada valideynlərə dəstək olur”.
