Sentyabrın 13-də Bakının Xətai rayonunda yetkinlik yaşına çatmayan şəxsin ölümü ilə bağlı araşdırma aparılır.
Bu barədə Baş Prokurorluq məlumat yayıb.
Bildirilib ki, ilkin araşdırma zamanı yeniyetmənin hündürmərtəbəli binadan özünü atdığı müəyyən edilib.
Hazırkı araşdırmalar zamanı onun “Roblox” oyun platformasında qarşılaşdığı, psixoloji vəziyyətinə mənfi təsir göstərən zərərli məzmun və çağırışların təsiri ilə bu addımı atdığı müəyyən olunub.
Hazırda hadisənin bütün səbəb və halları, o cümlədən yeniyetmənin istifadə etdiyi elektron qurğular vasitəsilə daxil olduğu internet resursları və qarşılaşdığı məzmunun onun psixoloji vəziyyətinə və davranışına mümkün təsiri araşdırılır.
Araşdırmanın nəticəsi barədə ictimaiyyətə əlavə məlumat veriləcək.
Baş Prokurorluq valideynləri uşaqların internet və sosial platformalardan istifadəsinə nəzarəti gücləndirməyə, onların qarşılaşdığı məzmunlara diqqət yetirməyə və uşaqların davranışında dəyişikliklər müşahidə edildikdə vaxtında tədbir görməyə çağırıb.
