Baş Dövlət Yol Polisi İdarəsi (DYP) həftəsonu və yay mövsümü ilə əlaqədar yollarda nəqliyyat axınının artacağını bildirərək sürücü və piyadalara müraciət edib.
Qurumun məlumatına görə, xüsusilə paytaxtdan bölgələrə, turizm və istirahət məkanlarına, eləcə də dənizkənarı ərazilərə gedən avtomobil yollarında hərəkətin intensivləşəcəyi gözlənilir. Bu isə yol-nəqliyyat hadisələrinin başvermə riskini artırır.
DYP sürücülərə hərəkət sürətini yol və hava şəraitinə uyğun seçməyi, uzun yola çıxmazdan əvvəl kifayət qədər dincəlməyi, yorğun və yuxusuz halda sükan arxasına əyləşməməyi, təhlükəsiz ara məsafəsini qorumağı, riskli ötmə və digər təhlükəli manevrlərdən çəkinməyi, həmçinin yol nişanları və digər hərəkətin təşkili vasitələrinin tələblərinə ciddi əməl etməyi tövsiyə edib.
Bundan əlavə, səfərdən əvvəl nəqliyyat vasitəsinin texniki sazlığının yoxlanılması da vacib hesab olunur.
Dənizkənarı və digər istirahət məkanlarına üz tutan piyadalara isə yolda mobil telefondan istifadə etməmək, yalnız müəyyən edilmiş piyada keçidlərindən keçmək tövsiyə olunub. Bildirilib ki, çimərliklər və istirahət zonalarının ətrafında hərəkətin intensivliyi nəzərə alınaraq, həm sürücülər, həm də piyadalar qarşılıqlı diqqət və ehtiyatlılıq nümayiş etdirməlidirlər.
