“Dənizkənarı Bulvar İdarəsi” publik hüquqi şəxsi eyni adlı qapalı səhmdar cəmiyyətinə (QSC) çevrilib.
Prezident İlham Əliyev bununla bağlı fərman imzalayıb.
Fərmana əsasən, QSC Bakıdakı Dənizkənarı Milli Parkın mühafizəsi, ərazisinə nəzarət və idarə edilməsi, saxlanılması, cari fəaliyyətinin və perspektiv inkişafının təmin edilməsi ilə məşğul olan dövlətə məxsus kommersiya hüquqi şəxsi olacaq.
Paytaxtdakı Dövlət Bayrağı Meydanının və Dövlət Bayrağı Muzeyinin mühafizəsi, ərazilərinə nəzarət və idarə edilməsi, saxlanılması, cari fəaliyyətinin və perspektiv inkişafının təmin edilməsi isə Prezidentin İşlər İdarəsi tərəfindən həyata keçiriləcək.
QSC-nin fəaliyyətinə ümumi rəhbərlik və nəzarət üçün sədr də daxil olmaqla üç üzvdən ibarət Müşahidə Şurası yaradılacaq. Cari rəhbərliyi isə sədr və iki müavindən ibarət İdarə Heyəti həyata keçirəcək.
Fərmana əsasən, QSC-nin yenidən təşkili və ləğvi, idarəetmə orqanlarının yaradılması, Müşahidə Şurasının sədr və üzvlərinin, həmçinin İdarə Heyətinin sədr və müavinlərinin vəzifəyə təyin və vəzifədən azad edilməsi ilə bağlı səlahiyyətlər Prezidentə həvalə olunub.
Nazirlər Kabineti QSC-nin nizamnaməsini və nizamnamə kapitalının məbləğini təsdiqləyəcək.
Maliyyə Nazirliyi isə QSC-nin strukturunun, ştat vahidlərinin və əməkhaqqı sisteminin maliyyə ekspertizasını həyata keçirəcək və onların optimallaşdırılması ilə bağlı tədbirlər görəcək.
