Azərbaycanın xarici işlər naziri Ceyhun Bayramov Rusiyaya rəsmi səfəri çərçivəsində Rusiya xarici işlər naziri Sergey Lavrovla görüşüb.
Azərbaycan Xarici İşlər Nazirliyinin məlumatına görə, görüşdə iki ölkə arasında siyasi, iqtisadi-ticarət, nəqliyyat və humanitar sahələrdə əməkdaşlığın vəziyyəti və perspektivləri, həmçinin regional və beynəlxalq təhlükəsizlik məsələləri müzakirə olunub.
Nazirlər Azərbaycan və Rusiya arasında müttəfiqlik münasibətlərinin qarşılıqlı hörmət və milli maraqların nəzərə alınması prinsipləri əsasında inkişaf etdirilməsinin əhəmiyyətini vurğulayıblar. Ali və yüksək səviyyədə əldə olunmuş razılaşmaların icra vəziyyəti də nəzərdən keçirilib.
Görüşdə beynəlxalq “Şimal-Cənub” nəqliyyat dəhlizi, multimodal daşımaların genişləndirilməsi və logistika marşrutlarının səmərəliliyinin artırılması məsələlərinə də toxunulub.
Cənubi Qafqazdakı vəziyyətə toxunan Ceyhun Bayramov Azərbaycanın sülh gündəliyinə sadiqliyini vurğulayıb və regionda davamlı sülhün təmin olunmasının əhəmiyyətini qeyd edib.
Görüş zamanı Yaxın Şərqdəki vəziyyət, Rusiya-Ukrayna münaqişəsi və digər regional və beynəlxalq təhlükəsizlik məsələləri ətrafında da fikir mübadiləsi aparılıb.
Səfər çərçivəsində Azərbaycan və Rusiya Xarici İşlər nazirlikləri arasında 2026–2027-ci illər üzrə Məsləhətləşmələr Planı da imzalanıb.
