ABŞ-dən olan tərəfdaşlar Azərbaycanı TRİPP layihəsi ilə bağlı aparılan danışıqlar barədə mütəmadi məlumatlandırırlar.
Bunu xarici işlər naziri Ceyhun Bayramov sentyabrın 9-da Bakıda BMT-nin İqlim Dəyişmələri üzrə Çərçivə Konvensiyasının Dördüncü İqlim Həftəsinin (CW4) yüksəksəviyyəli açılış mərasimi çərçivəsində jurnalistlərə açıqlamasında deyib.
Nazir bildirib ki, TRİPP-lə bağlı əsas danışıqlar ABŞ və Ermənistan arasında aparılır: “Amma eyni zamanda ABŞ-dən olan tərəfdaşlar Azərbaycan tərəfini mütəmadi olaraq məlumatlandırır. Çünki layihənin Azərbaycanın iştirakı olmadan baş tutması mümkünsüzdür”.
Ceyhun Bayramovun sözlərinə görə, əvvəl layihə üzrə prosesin ilin sonuna qədər başlayacağı bildirilsə də, son məlumatlar başlanğıcın 2027-ci ildə olacağını göstərir.
“Bizə verilən məlumat ondan ibarətdir ki, proses uğurla davam etdirilir. Bizə deyirdilər ki, bu istiqamətdə proses ilin sonuna qədər başlayacaq. Amma son məlumatlar prosesin 2027-ci ildə başlayacağını göstərir”, – deyə nazir qeyd edib.
Bayramov Ermənistan Xarici İşlər Nazirliyi ilə də mütəmadi əlaqələrin saxlanıldığını bildirib. O, yaxın zamanda Ermənistanın xarici işlər naziri ilə yeni görüşün keçirilməsinin istisna edilmədiyini deyib.
Nazir həmçinin delimitasiya prosesinin də mütəmadi müzakirə olunduğunu qeyd edib: “Həm Azərbaycan, həm də Ermənistan bu məsələni komissiya səviyyəsində aparır. Buna qədər ümumi delimitasiyanın şimaldan cənuba doğru aparılması razılaşdırılıb, dəqiqləşdirilib. Spesifik detallar vaxtı gəldikcə müzakirə edilir”.
