Azərbaycan boksçusu Cəmilə Muradlı Monteneqronun Budva şəhərində keçirilən 17 yaşadək idmançılar arasında Avropa çempionatının qalibi olub.
57 kq çəki dərəcəsində mübarizə aparan idmançımız finalda Almaniya təmsilçisi Aliya İbrahimiyə qalib gəlib. Hər üç raundu üstün başa vuran Cəmilə Muradlı hakimlərin yekdil qərarı ilə 5:0 hesablı qələbə qazanıb. Bütün hakimlər döyüşü 30:27 hesabı ilə Azərbaycan idmançısının xeyrinə qiymətləndiriblər.
Beləliklə, Azərbaycan millisinin Avropa çempionatındakı medallarının sayı 4-ə yüksəlib. Daha əvvəl Qardaş Rəhimov (54 kq), Hidayət Məmmədov (70 kq) və Xumar Cəfərli (+80 kq) bürünc medal qazanıblar.
Qeyd edək ki, bu gün Azərbaycan millisinin daha dörd üzvü final görüşünə çıxacaq.
