Cəlilabadda 7 il əvvəl itkin düşmüş şəxsin qəsdən öldürüldüyü müəyyən edilib.
Daxili İşlər Nazirliyi və Baş Prokurorluğun birgə məlumatına görə, 2019-cu ilin aprel ayında Göytəpə şəhər sakini Nadir Məmmədovun həmin ilin martında yaşadığı evdən çıxdıqdan sonra geri qayıtmaması barədə polisə müraciət daxil olub.
Faktla bağlı Cəlilabad rayon prokurorluğunda 8 avqust 2019-cu ildə cinayət işi başlanıb. Aparılan çoxsaylı istintaq və əməliyyat-axtarış tədbirlərinə baxmayaraq, Nadir Məmmədovun yeri müəyyən edilməyib və cinayət işi üzrə icraat sonuncu dəfə 18 oktyabr 2022-ci ildə dayandırılıb.
Sonrakı dövrdə istintaq və əməliyyat-axtarış tədbirlərinin davam etdirilməsi, həmçinin toplanmış sübutların təhlili nəticəsində Nadir Məmmədovun itkin düşməsinin qəsdən adam öldürmə ilə əlaqəli olduğu müəyyənləşdirilib.
İbtidai istintaqla Nadir Məmmədovun əvvəldən tanıdığı, 1959-cu il təvəllüdlü Ramiz Ələkbərov tərəfindən qisas almaq məqsədilə öldürülməsinə əsaslı şübhələr yaranıb.
İstintaqın məlumatına görə, 23 mart 2019-cu ildə Ramiz Ələkbərov Nadir Məmmədovu Göytəpə şəhəri ərazisində idarə etdiyi avtomobilə əyləşdirərək Masallı rayonunun Təzə Alvadı kəndində yerləşən evinin həyətinə aparıb. Həmin gün saat 22 radələrində Nadir Məmmədovu avtomobildə boğaraq öldürdüyü və meyitini həyətyanı sahədəki istifadəsiz su quyusuna atdığı bildirilir.
20 sentyabr 2026-cı ildə cinayət işi üzrə əməl Cinayət Məcəlləsinin 120.1-ci maddəsi ilə, yəni qəsdən adam öldürmə kimi tövsif edilib. Ramiz Ələkbərov şübhəli şəxs qismində tutulub və müdafiəçisinin iştirakı ilə dindirilərkən cinayəti törətdiyini etiraf edib.
Onun iştirakı ilə hadisə yerinə baxış zamanı göstərdiyi istifadəyə yararsız su quyusunda qazıntı aparılıb. Qazıntı zamanı insana məxsus olması ehtimal edilən sümük fraqmentləri aşkar edilərək götürülüb.
Hazırda cinayət işi üzrə zəruri istintaq və əməliyyat-axtarış tədbirləri davam etdirilir.
