Cari ilin ötən dövründə Fövqəladə Hallar Nazirliyinin (FHN) nəzarət etdiyi çimərlik ərazilərində sudaboğulma halı qeydə alınmayıb.
Bunu FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin ictimaiyyətlə əlaqələr və təbliğat şöbəsinin rəisi, daxili xidmət polkovnik-leytenantı Akşin Əlili çimərlik mövsümünün başa çatması ilə bağlı keçirilən brifinqdə deyib.
Onun sözlərinə görə, xilasedicilərin çevik müdaxiləsi nəticəsində bu ilin ötən dövründə su hövzələrində xilas edilənlərin sayı ötən ilin eyni dövrü ilə müqayisədə 31 faiz artaraq 73 nəfərdən 107 nəfərə yüksəlib.
Çimərlik mövsümündə sudaboğulma təhlükəsi ilə üzləşərək xilas edilənlərin sayı isə 70-dən 97 nəfərə çatıb. Bu, təxminən 39 faiz artım deməkdir.
Bildirilib ki, sudaboğulma hadisələri əsasən çimərlik üçün nəzərdə tutulmayan ərazilərdən istifadə zamanı baş verib. Buna küləkli havada və ya sərxoş halda suya girmək, uşaqların və yeniyetmələrin nəzarətsiz buraxılması, həmçinin çay, göl və suvarma kanallarından istifadə edilməsi daxildir.
