Beynəlxalq axtarışda olan Azərbaycan vətəndaşı Rusiyadan Azərbaycana ekstradisiya ediləcək.
Bu barədə Baş Prokurorluğun Mətbuat xidmətindən məlumat verilib.
Bildirilib ki, “Mülki, ailə və cinayət işləri üzrə hüquqi yardım və hüquqi münasibətlər haqqında” 7 oktyabr 2002-ci il tarixli Konvensiyanın tələblərinə uyğun olaraq Azərbaycan vətəndaşı Nahid Rasim oğlu Əlicanlının ekstradisiyası ilə bağlı Baş Prokurorluğun vəsatəti Rusiya Baş Prokurorluğu tərəfindən təmin edilib.
Məlumata görə, Qubadlı Hərbi Prokurorluğunda aparılan ibtidai istintaq zamanı Nahid Əlicanlının Azərbaycan Respublikası Cinayət Məcəlləsinin 333.4-1-ci (hərbi hissəni və ya xidmət yerini üç aydan artıq müddətə özbaşına tərk etmə) maddəsində nəzərdə tutulan cinayət əməlini törətməsinə əsaslı şübhələr müəyyən edilib.
Bununla əlaqədar onun təqsirləndirilən şəxs qismində cəlb edilməsi barədə qərar qəbul olunub. İstintaqdan yayınaraq gizləndiyinə görə Nahid Əlicanlı beynəlxalq axtarışa verilib.
Hazırda onun Azərbaycana gətirilməsi məqsədilə Ədliyyə Nazirliyinin Penitensiar Xidməti tərəfindən beynəlxalq prosedurlara uyğun müvafiq tədbirlər həyata keçirilir.
