Beyləqan rayonunda baş vermiş silahlı insidentlə bağlı Baş Prokurorluğun İstintaq idarəsində aparılan ibtidai istintaq başa çatıb.
Baş Prokurorluğun məlumatına əsasən, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi ilə birgə keçirilən istintaq və əməliyyat-axtarış tədbirləri nəticəsində ağır və xüsusilə ağır cinayətlərdə təqsirləndirilən şəxslər ifşa olunub.
İstintaqla müəyyən edilib ki, Beyləqan rayonunun Birinci Şahsevən kənd sakini Əhməd Məmişov müxtəlif vaxtlarda həmkəndlisi Orxan Bəyzadlını qəsdən öldürməyə iki dəfə cəhd edib. İlk dəfə ona yaşadığı evin həyətində odlu silahla atəş açılıb. Bu cəhd baş tutmadıqdan sonra isə “Daşburun” dəmiryol stansiyası yaxınlığında mismarçəkən alətlə çoxsaylı zərbələr endirilib.
Toplanmış sübutlar əsasında Əhməd Məmişov və Muxamed Abdullayevə Cinayət Məcəlləsinin müvafiq maddələri ilə ittiham elan edilib.
Cinayət işi üzrə ibtidai istintaq tamamlanaraq ittiham aktı təsdiqlənib və baxılması üçün məhkəməyə göndərilib.
