Baş Dövlət Yol Polisi İdarəsi (BDYPİ) iyulun 25-29-da gözlənilən isti hava şəraiti ilə əlaqədar sürücülərə xəbərdarlıq edib.
Qurum bildirib ki, yüksək temperatur diqqətin azalmasına, tez yorulmaya, reaksiya müddətinin uzanmasına və səhhətdə qəfil narahatlıqlara səbəb ola bilər ki, bu da yol-nəqliyyat hadisələrinin riskini artırır.
BDYPİ xüsusilə yaşlı və xroniki xəstəliklərdən əziyyət çəkən sürücülərə günün ən isti saatlarında zərurət olmadıqca səfərə çıxmamağı tövsiyə edib. Sürücülərə həmçinin avtomobillərin texniki vəziyyətini əvvəlcədən yoxlamaq, uzun səfərlərdə fasilələr vermək, özlərini narahat hiss etdikdə hərəkəti dayandırmaq, sürət həddinə riayət etmək və azyaşlı uşaqları avtomobildə nəzarətsiz saxlamamaq tövsiyə olunub.
Qurum sürücüləri səfərlərini mümkün qədər günün sərin saatlarına planlaşdırmağa və yol hərəkəti qaydalarına ciddi əməl etməyə çağırıb.
