Baş Dövlət Yol Polisi İdarəsi (BDYPİ) güclü külək gözlənilməsi ilə əlaqədar sürücülərə müraciət edib.
İdarədən verilən məlumata görə, Milli Hidrometeorologiya Xidmətinin proqnozuna əsasən, oktyabrın 19-da Bakı və Abşeron yarımadasında, eləcə də ölkənin bir sıra bölgələrində güclü külək əsəcək.
BDYPİ bildirib ki, güclü külək xüsusilə açıq ərazilərdə, körpülərdə, yolötürücülərində və magistral yollarda nəqliyyat vasitələrinin hərəkətinə ciddi təsir göstərə bilər. Küləyin qəfil istiqamət dəyişməsi avtomobilin idarə olunmasını çətinləşdirə, xüsusilə iri və qoşqulu nəqliyyat vasitələri üçün təhlükə yarada bilər.
İdarə sürücülərə sürəti hava şəraitinə uyğun seçməyi, ara məsafəsini artırmağı, qəfil manevrlərdən və sərt tormozlamadan çəkinməyi tövsiyə edib. Həmçinin avtomobillərin ağacların, reklam lövhələrinin, elektrik dirəklərinin və digər təhlükə yarada biləcək konstruksiyaların yaxınlığında saxlanılmamasının vacibliyi vurğulanıb.
BDYPİ bütün hərəkət iştirakçılarını hava şəraitini nəzərə almağa, yollarda diqqətli və məsuliyyətli davranmağa çağırıb.
