İspaniyanın Barselona şəhərində həftəsonu baş verən iğtişaşlar zamanı 128 nəfər saxlanılıb. Saxlanılanların 56 faizi yetkinlik yaşına çatmayanlardır.
Şəhərin meri Xaume Kolboni “Cadena SER” radiostansiyasının efirində bildirib ki, aksiyanın sosial şəbəkələrdə, xüsusilə TikTok-da təşkil edilməsi ciddi şübhələr doğurur.
Merin sözlərinə görə, iğtişaşlar nəticəsində şəhər əmlakına dəymiş ilkin ziyan 36 min avro qiymətləndirilir.
Hadisələr zamanı 14 polis əməkdaşı xəsarət alıb, onlardan dördünün vəziyyəti ağırdır.
Yanğınsöndürənlərə 33 çağırış daxil olub, ticarət obyektlərinə qarşı isə 23 vandalizm hadisəsi qeydə alınıb. Bundan başqa, polis 68 halda bıçaq, qaz balonu, fişəng, balaklava və digər əşyalar götürüb.
