Azərbaycanla Kamboca arasında imzalanmış üç sənədin oktyabrın 12-də Prezident İlham Əliyevin və Baş nazir Hun Manetin iştirakı ilə mübadiləsi mərasimi keçirilib.
Tədbirdə ADA Universiteti ilə Kambocanın Diplomatiya və Beynəlxalq Əlaqələr Milli İnstitutu arasında əməkdaşlıq haqqında Anlaşma Memorandumu mübadilə edilib. Sənədi ADA Universitetinin rektoru Hafiz Paşayev və Kambocanın Diplomatiya və Beynəlxalq Əlaqələr Milli İnstitutunun prezidenti Fann Makara mübadilə ediblər.
Həmçinin Azərbaycan və Kamboca hökumətləri arasında gəlirlərə görə vergilərə münasibətdə ikiqat vergitutmanın aradan qaldırılması, vergidən yayınmanın və vergi üstünlüklərindən sui-istifadənin qarşısının alınması haqqında Saziş mübadilə olunub. Sənədi Azərbaycanın iqtisadiyyat naziri Mikayıl Cabbarov və Kambocanın ticarət naziri Çam Nimul mübadilə ediblər.
Bundan başqa, iki ölkənin hökumətləri arasında ticarət və iqtisadi əməkdaşlıq haqqında Çərçivə Sazişi də mübadilə edilib. Bu sənədi də Mikayıl Cabbarov və Çam Nimul mübadilə ediblər.
