“Vital Hospital”da ölü doğulan körpənin meyitinin morqa deyil, xəstəxananın zirzəmisinə atıldığı iddia edilib.
Sosial şəbəkələrdə yayılan paylaşımda zərərçəkən şəxs bildirib ki, bütün müayinə və müalicələrə baxmayaraq, körpəsi ölü doğulub və meyit morqa yerləşdirilməyərək zirzəmiyə atılıb.
Məsələ ilə bağlı “Vital Hospital”ın mövqeyini öyrənmək cəhdləri nəticəsiz qalıb. Klinikanın əlaqə nömrəsinə edilən zənglər cavablandırılmayıb.
Səhiyyə Nazirliyindən bildirilib ki, yayılan məlumat Analitik Ekspertiza Mərkəzinin diqqətindədir. Qeyd olunub ki, məsələ ilə bağlı araşdırmaya başlanılıb, hüquq-mühafizə orqanları məlumatlandırılıb və araşdırmanın nəticələri barədə ictimaiyyətə əlavə məlumat veriləcək.
