Azərbaycanda qanunvericilikdə avtonom nəqliyyat vasitələrinin tətbiqinə imkan verən dəyişikliklər qəbul edilib.
Rəqəmsal İnkişaf və Nəqliyyat Nazirliyinin (RİNN) məlumatına görə, dəyişikliklər “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı” çərçivəsində həyata keçirilib.
Yeni hüquqi mexanizmlərlə ilk dəfə olaraq “avtonom nəqliyyat vasitəsi”, “operator” və “məsafədən idarəetmə mərkəzi” anlayışları qanunvericilikdə təsbit olunub, yüksək və tam avtomatlaşdırılmış idarəetmə səviyyələri müəyyən edilib.
Qanunvericilik dəyişiklikləri xüsusi marşrutlarda hərəkət edən sürücüsüz avtobusların, sürücüsüz metro qatarlarının, logistika və sənaye zonalarında istifadə ediləcək avtonom yük nəqliyyatının, eləcə də uzaqdan idarə olunan tramvay və dəmir yolu sistemlərinin qanuni əsaslarla istismarına imkan yaradacaq.
Avtonom nəqliyyat vasitələri yalnız dövlət qeydiyyatından keçdikdən və səlahiyyətli qurumların müəyyən etdiyi ərazilərdə istifadəyə buraxıldıqdan sonra fəaliyyət göstərə biləcək. İlkin mərhələdə sürücüsüz avtobusların xüsusi zolaqlarda və məhdud marşrutlarda sınaqdan keçirilməsi nəzərdə tutulur.
Sistemə nəzarət xüsusi şəhadətnaməyə malik operatorlar tərəfindən məsafədən idarəetmə mərkəzlərindən həyata keçiriləcək. Həmçinin avtonom nəqliyyat vasitələri üçün xüsusi tanınma nişanı tətbiq ediləcək.
