Azərbaycan Prezidenti İlham Əliyev və Qazaxıstan Prezidenti Kasım-Jomart Tokayev Trans-Xəzər Fiber-Optik Kabel Xəttinin onlayn formatda rəsmi açılışını ediblər.
Dövlət başçılarına layihə barədə məlumat verilib.
Bildirilib ki, “Rəqəmsal İpək Yolu” təşəbbüsü çərçivəsində Azərbaycan və Qazaxıstan tərəfindən reallaşdırılan layihə Asiya ilə Avropa arasında rəqəmsal əlaqələr üçün yeni imkanlar yaradır.
Sumqayıtla Aktau arasında Xəzər dənizinin dibi ilə təxminən 380 kilometrlik kabel xətti çəkilib. Xəttin ötürücülük qabiliyyəti saniyədə 400 terabitdən çoxdur.
Layihənin istismara verilməsi ilə Orta Dəhlizin təkcə nəqliyyat deyil, həm də rəqəmsal baxımdan strateji əhəmiyyəti artacaq. Yeni marşrut Çin və Mərkəzi Asiyadan məlumatların Azərbaycan, Qazaxıstan və Gürcüstan, daha sonra isə Qara dəniz və ya Türkiyə vasitəsilə Avropaya ötürülməsinə imkan verəcək.
Bu, beynəlxalq məlumat mübadiləsi imkanlarını genişləndirəcək və rəqəmsal kommunikasiyaların dayanıqlılığını artıracaq. Eyni zamanda, Azərbaycan və Qazaxıstan yalnız rəqəmsal xidmətlərin istehlakçısı deyil, həm də strateji rəqəmsal infrastruktur və xidmətlərin təchizatçısı kimi çıxış edəcəklər.
Yeni kabel xətti investisiyaların cəlb edilməsinə, süni intellekt üçün məlumat emalı mərkəzlərinin, bulud xidmətlərinin və hesablama güclərinin inkişafına da əlavə imkanlar yaradacaq. Layihə yüksək əlavə dəyərə malik yeni texnologiya sahələrinin və xidmətlərin inkişafı üçün perspektivlər açır.
