Prezident İlham Əliyev oktyabrın 5-də Pirallahı Sənaye Parkında “Gen Pharma Caucasus Manufacturing Operations” MMC-nin dərman istehsalı müəssisəsinin açılışında iştirak edib.
Ərazisi 5,2 hektar olan müəssisəyə ümumilikdə 113,9 milyon manat investisiya qoyulub. Layihənin maliyyələşdirilməsində özəl investisiya ilə yanaşı, Azərbaycan Biznesinin İnkişafı Fondunun 13,2 milyon manat investisiyasından və 10 milyon manat güzəştli kredit vəsaitindən istifadə edilib.
Müəssisənin illik istehsal gücü 60 milyon qutu dərman, o cümlədən 2,5 milyard tablet və kapsuldur. Burada kardiologiya, nevrologiya, urologiya, diabetologiya, qastroenterologiya, ağrıkəsici və antibiotiklər daxil olmaqla müxtəlif dərman vasitələrinin istehsalı nəzərdə tutulur.
Müəssisədə 178 nəfərin daimi işlə təmin ediləcəyi bildirilib.
Zavodda ABŞ, Yaponiya, Almaniya, İsveçrə, Çin, Danimarka, İsveç və Türkiyənin aparıcı şirkətlərinin istehsalı olan avadanlıqlar quraşdırılıb.
İstehsal edilən məhsulların Azərbaycan bazarı ilə yanaşı, Özbəkistan, Qazaxıstan, Gürcüstan və digər ölkələrə ixracı nəzərdə tutulur.
Müəssisənin inkişaf planlarına növbəti 5 il ərzində 500-dən çox preparatın istehsalının lokallaşdırılması, daxili tələbatın maksimum dərəcədə qarşılanması və ixrac coğrafiyasının genişləndirilməsi daxildir.
Qeyd edək ki, “Gen Pharma Caucasus Manufacturing Operations” MMC 2023-cü ildə Pirallahı Sənaye Parkının rezidenti statusunu alıb.
