Türkiyə Prezidenti Rəcəb Tayyib Ərdoğan bildirib ki, Səudiyyə Ərəbistanı, Türkiyə və Pakistan arasında imzalanan Məkkə sazişi regionda sülhün, rifahın və sabitliyin təmin olunmasını hədəfləyən bütün qardaş ölkələrin iştirakına açıqdır.
Ərdoğan “X” sosial şəbəkəsində paylaşımında qeyd edib ki, BMT Nizamnaməsinin 51-ci maddəsində təsbit olunmuş özünümüdafiə hüququnu da təsdiqləyən saziş heç bir ölkəni hədəf almır.
Onun sözlərinə görə, Türkiyə regional məsuliyyət və təşəbbüs baxışı çərçivəsində münaqişə və böhranların beynəlxalq hüquqa hörmət, dialoq və diplomatiya yolu ilə həllini dəstəkləməyə davam edəcək.
Türkiyə lideri əlavə edib ki, saziş təhlükəsizlik və müdafiə sahəsində əməkdaşlığın genişlənməsinə, müdafiə sənayesində birgə layihələrin həyata keçirilməsinə və terrorizmlə mübarizəyə mühüm töhfə verəcək.
Qeyd edək ki, Səudiyyə Ərəbistanı, Türkiyə və Pakistan bu gün birgə müdafiə haqqında Məkkə sazişini imzalayıblar.
