Bu ilin ilk altı ayında Azərbaycanda 2 254 müəssisədə 2 586 yoxlama aparılıb və onların 1 963-də müxtəlif uyğunsuzluqlar aşkarlanıb.
Bunu Azərbaycan Qida Təhlükəsizliyi Agentliyinin (AQTA) sədr müavini Əli Nəbiyev qurumun altı aylıq fəaliyyətinin yekunlarına dair mətbuat konfransında bildirib.
Onun sözlərinə görə, ciddi nöqsanlar aşkar edilən 316 müəssisənin fəaliyyəti məhdudlaşdırılıb, çatışmazlıqları aradan qaldıran 95 müəssisənin isə fəaliyyətinə yenidən icazə verilib.
Yoxlamalar zamanı 1 600 tona yaxın, 450 min litr və 130 min ədəd uyğunsuz məhsul məhv edilib, 430 ton məhsul utilizasiya olunub. Ticarət şəbəkələrindən isə 1 tondan çox yararsız məhsul yığışdırılıb. Həmçinin reydlər zamanı mənşəyi məlum olmayan və istehlaka yararsız 30,7 ton ət, o cümlədən 432 kiloqram at əti məhv edilib.
AQTA rəsmisi əlavə edib ki, ölkə üzrə 390 ümumtəhsil məktəbində aparılan monitorinqlər zamanı 263 məktəbdə normativ tələblərin pozulduğu müəyyən edilib. Yararlılıq müddəti bitmiş və ya satışı qadağan olunan məhsullar satışdan çıxarılıb, iki məktəb bufetinin fəaliyyəti isə məhdudlaşdırılıb.
