İnsan fəaliyyətinin yaratdığı iqlim dəyişikliyi isti hava dalğalarını gücləndirir və quraqlıq şəraitini ağırlaşdırır.
Ümumdünya Hava Atributu (WWA) konsorsiumunun apardığı təhlildə bu barədə bildirilib.
Məlumata görə, istilik dalğaları və quraqlıq kənd təsərrüfatında ciddi itkilərə, meşə yanğınlarının artmasına və çaylarda su səviyyəsinin azalmasına səbəb olur. Fransada son 50 ilin ən zəif qarğıdalı məhsuldarlığı qeydə alınıb, Rumıniyada isə bir milyon hektardan çox əkin sahəsi zərər görüb.
Təhlildə qeyd olunur ki, Qərbi Avropada kənd təsərrüfatı torpaqlarında quraqlıq ehtimalı iqlim dəyişikliyi səbəbindən beş dəfə, Şərqi Avropada isə 11 dəfə artıb. Anomal istilər nəticəsində buxarlanma riski isə təxminən 80 dəfə yüksəlib.
Alimlər bildirirlər ki, artan temperatur torpaqdakı nəmin daha sürətlə itirilməsinə səbəb olduğundan, əvvəlki illərlə müqayisədə eyni yağıntı çatışmazlığı daha ağır quraqlıq yaradır.
Tədqiqatçılar xəbərdarlıq edirlər ki, mövcud tendensiya davam edərsə, məhsul itkisi, çayların səviyyəsinin azalması, enerji sistemlərinə təzyiq və əsas ərzaq məhsullarının bahalaşması daha da güclənəcək.
London İmperial Kollecinin tədqiqatçısı Mariam Zakaria bildirib ki, qlobal temperaturun sənayeləşmədən əvvəlki dövrlə müqayisədə 2,8 dərəcə yüksəlməsi halında hazırkı quraqlıq kimi hadisələr adi hala çevrilə bilər.
