ABŞ Federal Məhkəməsi Vaşinqton administrasiyasının Azərbaycan, Ermənistan, Rusiya, Belarus, Qazaxıstan, Qırğızıstan, Özbəkistan, Gürcüstan və Moldova da daxil olmaqla 75 ölkədən olan şəxslərə immiqrant vizalarının verilməsinin dayandırılması ilə bağlı qərarını qanunsuz hesab edib.
Nyu-York Cənub Dairəsi Federal Məhkəməsinin bəyanatına görə, məhkəmə bu ölkələrdən müraciət edənlərə immiqrant vizalarının verilməsini tamamilə dayandıran siyasətin ləğv edilməli olduğu qənaətinə gəlib. Məhkəmə sözügedən siyasətin qanuna zidd olduğunu və səlahiyyətlərdən sui-istifadə edildiyini bildirib.
Məhdudiyyətlər ABŞ Dövlət Departamenti tərəfindən yanvar ayında tətbiq edilmişdi. ABŞ rəsmiləri siyahıya daxil edilən ölkələrin vətəndaşlarının hökumət üçün maliyyə yükünə çevrilmə və ölkədə sosial yardımlardan istifadə etmə ehtimalının yüksək olduğunu iddia etmişdilər.
Qərar yalnız ABŞ-yə daimi yaşamaq məqsədilə giriş üçün nəzərdə tutulan immiqrant vizalarına şamil olunurdu. Turist və digər müvəqqəti vizalar bu məhdudiyyətlərə daxil edilmirdi.
