ABŞ-nin Montana ştatının Billinqs şəhərində atışma və ardınca baş verən yanğın nəticəsində 4-ü uşaq olmaqla 8 nəfər həlak olub.
Hadisə avqustun 23-də fərdi yaşayış evində baş verib. Atışma barədə məlumat daxil olduqdan sonra polis hadisə yerinə gəlib. Hüquq-mühafizə orqanlarının əməkdaşları hadisə yerinə çatdıqda ev artıq alov içində olub.
Polis əməkdaşları evin arxa həyətində odlu silah yarası almış şübhəli şəxsi aşkar ediblər. İlkin məlumata görə, kişi özünə atəş açıb. O, xəstəxanaya çatdırılıb, lakin daha sonra aldığı xəsarətlərdən ölüb.
Yellouston dairəsinin şerifi Kent O’Donnell hadisənin ailə münaqişəsi zəminində başladığını bildirib. Polis hadisə ilə bağlı başqa şübhəlinin axtarılmadığını və cəmiyyət üçün davam edən təhlükənin olmadığını açıqlayıb.
