Məşhur türk tarixçisi İlber Ortaylının şəxsi əşyalarının satışa çıxarılması sosial şəbəkələrdə geniş müzakirələrə səbəb olub.
Tarixçinin qızı Tuna Ortaylı, atasının İstanbuldakı yeddi evində olan, kitabları və iş masaları istisna olmaqla digər ev əşyalarını ikinci əl məhsulların satıldığı “WhatsApp” qrupunda satışa çıxarıb.
Satışa qoyulan əşyaların qiymətləri 100-800 Türkiyə lirəsi arasında dəyişib. Əşyaların bu qədər aşağı qiymətə satışa çıxarılması sosial mediada tənqid edilib.
Tənqidlərdən sonra Tuna Ortaylı sosial media hesabında açıqlama yayaraq bildirib ki, satışdan əldə olunacaq vəsait TEMA Fondu vasitəsilə İlber Ortaylının adına xatirə meşəsi və kitabxananın yaradılmasına yönəldiləcək.
“Atam çay fincanları və ya köhnə əşyalarla deyil, kitabları və qoyub getdiyi elmi irsi ilə xatırlanmaq istərdi”, – deyə Tuna Ortaylı qeyd edib.
