Azərbaycan Ordusunun Təlim və Tədris Mərkəzinin Maliyyə Xidmətinin sabiq rəisi, polkovnik-leytenant Rəşad Məlikzadə barəsində çıxarılmış hökmdən verilən kassasiya şikayətinə baxılıb.
Ali Məhkəmədə keçirilən prosesdə kassasiya şikayəti təmin edilməyib və əvvəlki məhkəmə qərarları qüvvədə saxlanılıb.
Rəşad Məlikzadə 2022-ci il sentyabrın 26-da Dövlət Təhlükəsizliyi Xidməti tərəfindən saxlanılıb.
Bakı Hərbi Məhkəməsinin hökmü ilə o, 10 il 6 ay müddətinə azadlıqdan məhrum edilib. Sonradan Bakı Apellyasiya Məhkəməsi də bu hökmü qüvvədə saxlayıb.
Sabiq maliyyə xidməti rəisi Cinayət Məcəlləsinin xüsusilə külli miqdarda mənimsəmə və vəzifə saxtakarlığı maddələri ilə təqsirli bilinib.
İttihama görə, Rəşad Məlikzadə 9 milyon 369 min 411 manat dövlət vəsaitini mənimsəyib. O, bu məbləğin 848 min manatını dövlət büdcəsinə ödəyib. Məhkəmənin qərarı ilə onun əmlakları da müsadirə edilib.
