Əmək və Əhalinin Sosial Müdafiəsi Nazirliyinin sosial layihəsi çərçivəsində Bakının Ümid qəsəbəsi, Abşeron və Samux rayonlarında yerləşən yeni yaşayış komplekslərində mənzillərin satışı davam edir.
Nazirlikdən bildirilib ki, 3 və 4 otaqlı, tam təmirli, istifadə olunmamış, çıxarışlı və ipoteka krediti ilə əldə edilə bilən mənzillər bazar qiymətindən xeyli aşağı qiymətlərlə satışa çıxarılıb. Mənzillərin bir kvadratmetrinin qiyməti 435–830 manat arasında dəyişir.
Mənzillərlə ms.sosial.gov.az portalında tanış olmaq mümkündür. İstifadəçilər portal üzərindən “Bron et” düyməsi vasitəsilə seçdikləri mənzili bron edə bilərlər.
Qaydalara əsasən, bir mənzili eyni vaxtda üç nəfər bron edə bilər. İlk bron edən şəxs mənzili almadıqda, satınalma hüququ növbəti bron edən şəxsə keçir.
Mənzili alan şəxslə Əmək və Əhalinin Sosial Müdafiəsi Nazirliyi arasında 10 gün müddətində alqı-satqı müqaviləsi bağlanır. Bir fiziki və ya hüquqi şəxs istədiyi sayda mənzil ala bilər.
Satışdan əldə olunan vəsait şəhid ailələrinin və müharibə ilə əlaqədar əlilliyi olan şəxslərin mənzillə təminatına yönəldiləcək.
Əlavə məlumat almaq istəyənlər 142 Çağrı Mərkəzinə müraciət edə bilərlər.
