Azərbaycanda noyabrın 5-də bəzi ərazilərdə yağış, leysan və dolu, dağlıq ərazilərdə isə qar yağacağı gözlənilir.
Milli Hidrometeorologiya Xidmətinin məlumatına görə, Bakıda və Abşeron yarımadasında hava dəyişkən buludlu, əsasən yağmursuz olacaq. Lakin axşam bəzi yerlərdə yağış yağacağı, gecəyə doğru isə yarımadanın ayrı-ayrı ərazilərində yağıntının intensivləşəcəyi və şimşək çaxacağı ehtimalı var. Səhər saatlarında arabir duman müşahidə ediləcək.
Mülayim cənub-qərb küləyi axşama doğru güclü şimal-qərb küləyi ilə əvəz olunacaq.
Bakıda və Abşeron yarımadasında havanın temperaturu gecə 12-16°, gündüz 18-21° isti olacaq. Atmosfer təzyiqi 755 mm civə sütunundan 762 mm civə sütununa yüksələcək. Nisbi rütubət 70-80 faiz təşkil edəcək.
Azərbaycanın rayonlarında hava əsasən yağmursuz keçəcək. Lakin gündüz şimal və qərb rayonlarından başlayaraq bəzi yerlərdə arabir yağış yağacağı gözlənilir. Ayrı-ayrı ərazilərdə yağıntılar leysan xarakterli və intensiv olacaq, şimşək çaxacaq, dolu düşəcək. Dağlıq ərazilərdə qar yağacağı, axşam saatlarında isə yağıntıların bir qədər güclənəcəyi ehtimal edilir. Bəzi yerlərdə arabir duman olacaq, qərb küləyi arabir güclənəcək.
Rayonlarda havanın temperaturu gecə 9-14°, gündüz 18-23° isti, dağlıq ərazilərdə isə gecə 3-8°, gündüz 12-17° isti olacaq.
