Türkiyə Ticarət Nazirliyi Ermənistanla münasibətlərin normallaşması prosesi çərçivəsində gömrük sistemində texniki dəyişiklik həyata keçirib.
Türkiyənin hökumətyönlü “Sabah” qəzetinin məlumatına görə, ölkənin BILGE gömrük sisteminə Ermənistanın rəsmi “077” ölkə kodu əlavə olunub.
Yeni qaydaya əsasən, bundan sonra Ermənistanla üçüncü ölkələr vasitəsilə həyata keçirilən idxal, ixrac və tranzit əməliyyatlarının gömrük bəyannamələrində Ermənistanın rəsmi kodundan istifadə edilə biləcək.
Dəyişiklik həmçinin Türkiyədən üçüncü ölkəyə, oradan isə Ermənistana göndərilən yüklərin təyinat və ya mənşə ölkəsi kimi Ermənistanın göstərilməsinə imkan yaradır.
Məlumata görə, hazırda Türkiyə ilə Ermənistan arasında ticarət dövriyyəsi 335–350 milyon ABŞ dolları təşkil edir. Qısa müddətdə bu göstəricinin 1 milyard dollara çatdırılması hədəflənir.
