2026-cı il dünya çempionatının qalibləri futbol tarixində ilk dəfə xüsusi çempionluq üzükləri ilə təltif olunacaqlar.
Beynəlxalq Futbol Federasiyaları Assosiasiyasının (FIFA) məlumatına görə, bu ənənə ilk dəfə FIFA-nın bayrağı altında keçirilən turnirdə tətbiq ediləcək. Çempionluq üzükləri ABŞ-ın peşəkar idman liqalarında geniş yayılmış ənənədən ilhamlanaraq hazırlanıb.
Üzüklərdən cəmi 2026 ədəd istehsal ediləcək. Onların yalnız 30-u dünya çempionu olacaq komandanın futbolçularına və məşqçilərinə təqdim olunacaq. Qalan 1996 üzük isə FIFA-nın rəsmi lisenziyalı məhsulu kimi satışa çıxarılacaq.
Üzüyün bir tərəfində dünya çempionatının kuboku, digər tərəfində isə qalib komandanın loqosu həkk olunacaq. Hər bir üzük fərdi nömrələnəcək, sahibinin ölçüsünə uyğun hazırlanacaq və orijinallıq sertifikatı ilə təqdim ediləcək.
Finaldan dərhal sonra komandanın kapitanı və baş məşqçisi müvəqqəti üzüklər alacaq. Daha sonra isə bütün çempionluq üzükləri fərdi sifariş əsasında hazırlanaraq rəsmi mərasimdə təqdim olunacaq.
DÇ-2026-nın finalında İspaniya və Argentina milliləri üz-üzə gələcək. Qarşılaşma iyulun 19-da Nyu-Cersidə keçiriləcək.
