Azərbaycanda hava şəraiti qeyri-sabit keçib. Şahdağa qar yağıb, oktyabrın 22-də isə Gədəbəyin bəzi ərazilərinə xırda dənəli dolu düşüb.
Milli Hidrometeorologiya Xidmətinin məlumatına görə, oktyabrın 23-ü saat 11:00-a olan məlumata əsasən, ölkənin bəzi yerlərində leysan xarakterli yağış yağıb, şimşək çaxıb.
Ən çox yağıntı Şamaxıda qeydə alınıb. Burada 63 mm yağıntı düşüb ki, bu da aylıq normanın 83 faizini təşkil edir. Oğuzda 52 mm (aylıq normanın 51 faizi), Saatlıda 17 mm (42 faiz), Kişçayda (Şəki) 15 mm, Sarıbaşda (Qax) 12 mm, Zaqatala və Tərtərdə 11 mm, Ordubad və Qubada isə 10 mm yağıntı qeydə alınıb.
Şahdağda 9 mm, digər bir sıra rayonlarda isə 8 mm-dək yağıntı düşüb. Bakıda və Abşeron yarımadasında yağıntının miqdarı 1 mm-dək olub.
Bununla yanaşı, Kəlbəcər, Laçın, Qubadlı, Şuşa, Xankəndi, Xocalı və Füzuli rayonlarında qısamüddətli, intensiv leysan xarakterli yağış yağıb.
