Azərbaycanda LGBT təbliğatının qadağan edilməsi haqqında qanun qəbul olunacağı barədə məlumat yayılıb.
Xəbər Mərkəzi “Operativ Media”ya istinadən xəbər verir ki, yeni qanunla LGBT mövzusunun ictimai məkanlarda, mediada və digər informasiya kanallarında təbliği ilə bağlı məhdudiyyətlərin tətbiqi nəzərdə tutulur.
Yeni qanunun qəbulu və tətbiqi ilə bağlı aşağıdakı kateqoriyalar üzrə müvafiq addımlar atılacaq:
Media və internet: LGBT münasibətlərini təşviq etdiyi hesab olunan məlumatların yayılması məhdudlaşdırılacaq.
Reklam və kino: Müvafiq məzmunun reklam və filmlərdə yayılması, təbliği qadan ediləcək.
Təhsil: Məktəblərdə qeyri-ənənəvi seksual orientasiyaları təbliğ edəcək məzmun birmənalı olaraq məqbul hesab edilməyəcək.
Hüquqi məsuliyyət: qanun pozulması hallarında cərimə və digər inzibati tədbirlər tətbiq olunacaq.
Məlumatda qeyd olunur ki, qanunun tətbiqi uşaqların sağlamlığına və inkişafına zərərli hesab edilə biləcək informasiyalardan qorunması məqsədi daşıyır. Bu çərçivədə “qeyri-ənənəvi seksual orientasiyanın” və pedofiliyanın təbliğinin uşaqlar üçün qadağan olunmuş informasiya kateqoriyasına daxil edilməsi nəzərdə tutulur.
Müddəalara əsasən, məhdudiyyətlərin kütləvi informasiya vasitələrinə də şamil olunacağı bildirilir. Pozuntu aşkarlandığı halda media qurumlarının fəaliyyətinin dayandırılması, xarici media subyektlərinin isə ölkədə fəaliyyət icazəsinin ləğvi kimi tədbirlərin tətbiqi nəzərdə tutulur. Media qurumlarının sahibləri və rəhbərləri üçün də məsuliyyət müəyyənləşdirilə bilər.
Bununla yanaşı, telekommunikasiya şəbəkələri və onlayn platformalarda yayılan paylaşımların, videoların, bloq yazılarının və ictimai çağırışların da məhdudiyyətlərin əhatə dairəsinə düşə biləcəyi qeyd olunur.
Reklam və kino sahəsində müvafiq məzmunun yayılmasına da məhdudiyyətlərin tətbiqi nəzərdə tutulur.
Məlumatda vurğulanır ki, mümkün pozuntulara görə cərimələr və təkrar hallar zamanı inzibati həbs də daxil olmaqla tədbirlər tətbiq edilə bilər. Media və internet resurslarına qarşı tənbeh tədbirlərinin müvafiq hüquqi prosedurlar çərçivəsində həyata keçiriləcəyi bildirilir.
