Şəmkirdə restoranda baş verən kütləvi zəhərlənmə nəticəsində 11 nəfər xəstəxanaya yerləşdirilib.
TƏBİB-in məlumatına görə, zəhərlənmə şübhəsi ilə 9 qadın və 2 kişi Şəmkir Rayon Mərkəzi Xəstəxanasının Təcili tibbi yardım şöbəsinə hospitalizasiya olunub. Pasiyentlərə zəruri ilkin tibbi yardım göstərilib.
Bildirilib ki, onların hər birinin vəziyyəti qənaətbəxş qiymətləndirilib və ambulator müalicə üçün evə buraxılıblar.
İlkin məlumata əsasən, zəhərlənən şəxslər rayon ərazisindəki restoranlardan birində keçirilən məclisdə qida qəbul etdikdən sonra özlərini pis hiss ediblər. Onların yedikləri salatdan zəhərləndikləri ehtimal olunur.
Faktla bağlı araşdırma aparılır.
