Tovuz rayonunun Qovlar şəhərində qadın evdə aldığı yanıq xəsarətləri nəticəsində ölüb.
İlkin məlumata görə, hadisə Xəqani küçəsində yerləşən fərdi yaşayış evində baş verib. 22 yaşlı Elyar Hüseynlinin anası, 1984-cü il təvəllüdlü Nüşabə Hüseynovanın üzərinə benzin tökərək onu yandırdığı iddia edilir.
Ağır yanıq xəsarətləri alan qadın xəstəxanaya yerləşdirilib, lakin onun həyatını xilas etmək mümkün olmayıb.
Hadisə ilə bağlı Fövqəladə Hallar Nazirliyinin Dövlət Yanğından Mühafizə Xidmətinin qüvvələri əraziyə cəlb olunub. Ümumi sahəsi 100 kvadratmetr olan bir mərtəbəli fərdi yaşayış evində baş verən yanğın qısa müddətdə söndürülüb. Yanğın nəticəsində üçotaqlı evin bir otağında yataq dəsti və döşəmə 1 kvadratmetr sahədə yanıb.
Polis əməkdaşlarının keçirdiyi tədbirlər nəticəsində Elyar Hüseynli saxlanılıb. Hadisə ilə bağlı araşdırma aparılır.
