İran Prezidenti Məsud Pezeşkian BMT Baş Assambleyasının 81-ci sessiyasında çıxışı zamanı İsraili atom bombası və digər kütləvi qırğın silahlarına sahib olmaqda ittiham edib. O, İranın nüvə proqramı ilə bağlı yoxlanış tələbinin anlaşılmaz olduğunu bildirib.
Pezeşkian İranın xüsusi imtiyaz istəmədiyini, bərabər hüquqların tərəfdarı olduğunu deyib.
Onun sözlərinə görə, İsrail Qəzza zolağı və digər ərazilərə hücum edir, İran isə sanksiyalara məruz qalır. İran Prezidenti bildirib ki, ölkəsi müharibədən qorxmur və sülh üçün danışıqlardan qaçmır.
Pezeşkian nüvə texnologiyasının İran üçün inkişafın bir hissəsi olduğunu vurğulayıb. O qeyd edib ki, nüvə enerjisi xəstələrin müalicəsi, fermerlər və gələcəkdə dayanıqlı elektrik enerjisi üçün əhəmiyyətlidir.
İran Prezidenti nüvə elminin bir neçə ölkənin inhisarında olmasını qəbul etmədiklərini bildirib.
O, həmçinin Hörmüz boğazı ilə bağlı danışaraq, bu su yolundan hamının faydalanmasının, lakin İranın gəmiçilikdən məhrum edilməsinin mümkün olmadığını deyib. Pezeşkian düşmən donanmalarının daimi yerləşdirilməsinin və müharibənin genişlənməsinin sülhə gətirib çıxarmadığını vurğulayıb.
Pezeşkian çıxışında Fələstin məsələsinə də toxunub.
