Ermənistan Baş naziri Nikol Paşinyan ölkəsinin balanslaşdırılmış xarici siyasəti davam etdirmək niyyətində olduğunu bildirib.
Paşinyan bu barədə BMT Baş Assambleyasının 81-ci sessiyası çərçivəsində Nyu-Yorkda jurnalistin sualını cavablandırarkən danışıb. O, Ermənistanın Avropa İttifaqı (Aİ) ilə yaxınlaşması ilə bağlı suala belə cavab verib:
“Biz bir erməni stulunda otururuq, ona görə də iki stula ehtiyacımız yoxdur”.
Paşinyan Avropanın Ermənistan məhsullarının 99 faizi üçün bazarı açacağı ilə bağlı vədlərin yerinə yetirilməməsi riskinə dair suala cavabında isə İrəvanın bütün tərəfdaşları ilə dürüst və açıq olmağa çalışdığını və qarşılıqlılığa ümid etdiyini bildirib.
Qeyd edək ki, Aİ sentyabr ayında Ermənistan məhsullarına müvəqqəti ticarət güzəştləri ilə bağlı tədbirləri dəstəkləyib. Aİ Şurasının məlumatına görə, təklif olunan tədbirlər Ermənistanın Aİ-yə ixracının təxminən 80 faizini əhatə edir.
