Azərbaycan, Özbəkistan və Türkiyə hərbçilərinin iştirakı ilə ölkəmizdə “Birliyin Gücü – 2026” birgə hərbi təlimi keçiriləcək.
Bu barədə Müdafiə Nazirliyi məlumat yayıb.
Üç mərhələdən ibarət olacaq təlim Azərbaycan Ordusunun Qarabağ iqtisadi rayonunda yerləşən “Qızılqaya” Təlim Mərkəzində, Naxçıvan Muxtar Respublikasındakı “Qarabağlar” Təlim Mərkəzində, həmçinin Xəzər dənizinin Azərbaycana aid akvatoriyasında yerləşən “Böyük Zirə” təlim rayonunda keçiriləcək.
Təlimə şəxsi heyətlə yanaşı, döyüş texnikaları, dəniz və aviasiya vasitələri, eləcə də pilotsuz uçuş aparatları cəlb olunacaq.
Təlimin əsas məqsədi üç ölkənin hərbi bölmələrinin birgə əməliyyatlara hazırlığını artırmaq, qoşunlar arasında koordinasiyanı və təlim prosedurlarını standartlaşdırmaq, həmçinin bölmələrin yeni döyüş imkanlarını təkmilləşdirməkdir.
Təlimdə iştirak etmək üçün Türkiyə Silahlı Qüvvələrinin şəxsi heyəti və aviasiya vasitələri Azərbaycana gəlib.
Müvafiq plana uyğun olaraq hərbi qulluqçuların yerləşdirilməsi və digər təşkilati məsələlərlə bağlı tədbirlər görülüb.
