Ermənistanın Baş naziri Nikol Paşinyan “Beynəlxalq Sülh və Rifah üçün Tramp Marşrutu” (TRIPP) layihəsinin həyata keçirilməsi ilə bağlı iclas keçirib.
Ermənistan hökumətinin məlumatına görə, iclasda TRIPP Development Company (TDC) şirkətinin hüquqi və müqavilə çərçivəsi, eləcə də qarşıda duran vəzifələr müzakirə olunub. Şirkətin nizamnaməsinin layihəsi və səhmdarlar arasında saziş üzərində görülən işlər də təqdim edilib. (NEWS.am)
Bundan bir gün əvvəl Ermənistan Konstitusiya Məhkəməsi Ermənistan və ABŞ arasında TRIPP layihəsi üzrə strateji tərəfdaşlığa dair çərçivə sazişinin ölkə Konstitusiyasına uyğun olduğu barədə qərar qəbul edib. Müsbət qərardan sonra sazişin təsdiq üçün parlamentə təqdim edilməsi nəzərdə tutulur.
Ermənistan və ABŞ arasında TRIPP layihəsi çərçivəsində strateji əməkdaşlığa dair çərçivə sazişi iyunun 4-də imzalanıb. (arka.am)
Xatırladaq ki, 2025-ci ilin avqustunda Azərbaycan Prezidenti İlham Əliyev, Ermənistanın Baş naziri Nikol Paşinyan və ABŞ Prezidenti Donald Tramp TRIPP layihəsi üzrə çərçivənin hazırlanması ilə bağlı birgə bəyannamə imzalayıblar.
Layihə Ermənistan ərazisindən keçməklə Azərbaycanın əsas hissəsini Naxçıvan Muxtar Respublikası ilə birləşdirəcək nəqliyyat bağlantısının yaradılmasını nəzərdə tutur. Təqdim olunan layihəyə avtomobil və dəmir yolları, eləcə də neft-qaz infrastrukturu daxildir. Marşrutun Ermənistan ərazisindəki hissəsinin uzunluğu 42 kilometr olaraq göstərilir.
