Paris məhkəməsi 2018-ci ildə aktrisa Şarlotta Arnuldun zorlanması işi üzrə qəbul edilmiş qərarla bağlı məşhur fransız aktyor Jerar Depardyenin apellyasiya şikayətinə baxacaq.
Bu barədə “Agence France-Presse” (AFP) özəl mənbələrinə istinadən məlumat yayıb.
Məlumata görə, Depardyenin vəkilləri qapalı məhkəmə iclasında öz dəlillərini təqdim edəcəklər. Müdafiə tərəfi işə xitam verilməsinə nail olmağa çalışacaq.
Qeyd edək ki, 2025-ci ilin avqustunda qəbul edilmiş qərara əsasən, Depardyenin Şarlotta Arnuldun zorlanması ittihamı ilə məhkəməyə cəlb edilməsi nəzərdə tutulur.
2025-ci ilin mayında isə Paris məhkəməsi başqa bir iş üzrə Depardyeyə 18 aylıq şərti həbs cəzası verib. Aktyor 2021-ci ildə “Les Volets Verts” filminin çəkiliş meydançasında iki qadına qarşı cinsi qısnama hərəkətlərində təqsirli bilinib.
Məhkəmə, həmçinin Depardyenin zərərçəkmişlərin hər birinə mənəvi zərərə görə 1 000 avro təzminat ödəməsinə qərar verib.
