Baş Dövlət Yol Polisi İdarəsi (BDYPİ) yağışlı hava şəraiti ilə əlaqədar sürücülərə müraciət edib.
Qeyd olunub ki, yağış zamanı yol örtüyünün sürüşkən olması, görünüş məsafəsinin azalması və nəqliyyat vasitələrinin tormoz yolunun uzanması qəza riskini artırır.
BDYPİ sürücülərə yağışlı hava şəraitində sürəti yol və hava şəraitinin imkan verdiyi təhlükəsiz həddə qədər azaltmağı, qarşıdakı nəqliyyat vasitəsi ilə ara məsafəsini artırmağı, kəskin manevrlərdən və qəfil tormozlamadan çəkinməyi tövsiyə edib.
İdarə bildirib ki, yol nişanında göstərilən maksimal sürət həddi bütün hava şəraitlərində həmin sürətlə hərəkətin təhlükəsiz olduğu anlamına gəlmir. Sürücü mövcud yol və hava şəraitini nəzərə alaraq sürəti təhlükəsiz idarəetməni təmin edəcək səviyyədə seçməlidir.
Xatırladaq ki, yağışlı havada sürətin azaldılması təhlükəsiz hərəkətin əsas şərtlərindən biridir.
