Fövqəladə Hallar Nazirliyi ölkə ərazisində gözlənilən güclü külək və yağıntılı hava şəraiti ilə əlaqədar əhaliyə müraciət edib.
Milli Hidrometeorologiya Xidmətinin məlumatına görə, avqustun 30-dək ölkə ərazisində güclü külək əsəcəyi, ayrı-ayrı yerlərdə intensiv yağış yağacağı və bəzi dağ çaylarından qısamüddətli sel keçəcəyi proqnozlaşdırılır.
FHN güclü külək zamanı yüngül konstruksiyalı və müvəqqəti tikililərdən, bina və reklam lövhələrindən uzaq durmağı, elektrik dirəkləri və naqillərinin, eləcə də hündür ağacların altında dayanmamağı tövsiyə edib.
Kiçikhəcmli gəmi istifadəçilərinə belə hava şəraitində dənizə çıxmamaq, vətəndaşlara isə güclü külək zamanı çimərliklərdə dənizə girməmək tövsiyə olunur.
Nazirlik həmçinin sel və daşqın təhlükəli ərazilərdən uzaq durmağı, belə təhlükə yarandıqda isə dərhal yaxınlıqdakı yüksəkliyə qalxmağı tövsiyə edib.
İldırım zamanı elektrik cihazlarının şəbəkədən ayrılması, açıq havada elektrik xətləri, ildırımötürücülər, navalçalar, antenalar və hündür ağaclardan uzaq durulması tövsiyə olunur. Avtomobildə olan şəxslərə isə hərəkəti dayandıraraq şüşələri qaldırmaq və ildırımın bitməsini gözləmək tövsiyə edilib.
