Azərbaycanda 2026–2030-cu illər üçün turizmin inkişafına dair Dövlət Proqramı təsdiqlənib.
Prezident İlham Əliyev bununla bağlı Sərəncam imzalayıb.
Sərəncama əsasən, Nazirlər Kabineti altı ay müddətində Dövlət Turizm Agentliyinin təklifləri əsasında “Turizm haqqında” qanunun təkmilləşdirilməsi ilə bağlı təkliflər hazırlamalıdır. Həmçinin üç ay ərzində turizm layihələrinə investisiya təşviqi sənədinin verilməsi və bu mexanizmin turizm sektorunun xüsusiyyətləri nəzərə alınmaqla təkmilləşdirilməsi təmin edilməlidir.
Nazirlər Kabinetinə Dövlət Proqramında nəzərdə tutulan tədbirlərin əlaqələndirilməsi və icrasına nəzarət, həmçinin müəyyən edilmiş subsidiya şərtlərinin hazırlanması tapşırılıb. Proqramın icrası barədə Prezidentə ildə bir dəfə məlumat təqdim ediləcək.
Rəqəmsal İnkişaf və Nəqliyyat Nazirliyi üç ay müddətində hava nəqliyyatının turizmin inkişafına töhfəsinin artırılması ilə bağlı təkliflərini Nazirlər Kabinetinə təqdim etməlidir.
Maliyyə və İqtisadiyyat nazirlikləri Dövlət Turizm Agentliyi ilə birlikdə proqramda nəzərdə tutulan tədbirlərin maliyyələşdirilməsi üçün hər il dövlət büdcəsinin və dövlət investisiya proqramlarının hazırlanması zamanı zəruri vəsaitlərin nəzərdə tutulması istiqamətində tədbirlər görəcəklər.
Dövlət Proqramının icrasının monitorinqi və qiymətləndirilməsi isə Dövlət Turizm Agentliyinin sifarişi əsasında İqtisadi İslahatların Təhlili və Kommunikasiya Mərkəzi tərəfindən həyata keçiriləcək.
