ABŞ Prezidenti Donald Trampın İranla bağlı siyasətində yenidən gözləmə strategiyasına üstünlük verdiyi bildirilir.
“The Wall Street Journal”ın ABŞ Administrasiyasındakı anonim mənbələrə istinadən yaydığı məlumata görə, genişmiqyaslı müharibəyə başlamaq istəməyən və diplomatik danışıqlara ehtiyatla yanaşan Tramp iqtisadi təzyiqlərin nəticəsini görmək üçün vaxt qazanmağa çalışır.
Məlumata əsasən, Vaşinqton maliyyə sanksiyalarının təsirini artırmaqla yanaşı, İranın dəniz limanlarına tətbiq olunan ABŞ blokadasının nəticələrini də gücləndirməyə çalışır.
Nəşrin məlumatına görə, bu strategiya Trampın bir sıra müşavirləri tərəfindən dəstəklənir. Bununla belə, ekspertlər İranın ABŞ-ın bu addımlarına sərt reaksiya verə biləcəyini düşünürlər.
ABŞ administrasiyasında və kəşfiyyat orqanlarında çalışmış, İranın nüvə proqramı ilə bağlı məsələlər üzrə fəaliyyət göstərmiş Erik Brüer isə bildirib ki, İranın ABŞ-ın təzyiqləri qarşısında passiv qalacağını gözləmək olmaz.
Onun sözlərinə görə, ABŞ-nin qarşısında hazırda yaxşı seçimlər deyil, yalnız “pis variantlar” var.
