Bu gün Bakı və Ağdaşın bəzi ərazilərində planlı təmir işləri ilə əlaqədar elektrik enerjisinin verilişində fasilələr yaranacaq.
“Azərişıq” ASC-nin məlumatına görə, işlər elektrik enerjisinin keyfiyyətinin artırılması və artan yük tələbatının qarşılanması məqsədilə aparılır.
Yasamal Rayon Enerji Təchizatı və Satışı İdarəsinin xidməti ərazisində Cəfər Cabbarlı, Zivər bəy Əhmədbəyov və Məhəmməd Naxçıvani küçələrinin bir hissəsində, Nərimanov RETSİ-yə daxil olan Böyükşor qəsəbəsinin bəzi ərazilərində isə saat 09:00-dan 13:00-dək elektrik enerjisinin verilişində məhdudiyyət olacaq.
Ağdaş Elektrik Şəbəkəsinin ərazisində isə saat 10:00-dan 13:00-dək Aşağı Ağcayazı, Yuxarı Ağcayazı, Dəhnə kəndləri, Türyançay qəsəbəsi və şəhərin 42-ci məhəlləsi, saat 10:00-dan 14:00-dək isə Qoşaqovaq, Qolqəti və Şəkili kəndləri elektrik enerjisiz qalacaq.
Qurum bildirir ki, təmir işləri başa çatdıqdan sonra abonentlər daha keyfiyyətli və dayanıqlı elektrik enerjisi ilə təmin olunacaqlar.
