İxtisaslaşdırılmış gəmi Bakı limanından çıxaraq Qazaxıstanın Aktau limanı istiqamətində Transxəzər Fiber-Optik Kabel Xəttinin çəkilişinə başlayıb.
Qazaxıstanın Süni İntellekt və Rəqəmsal İnkişaf Nazirliyinin məlumatına görə, əlverişli hava şəraitində sualtı kabelin çəkilişinin 15–20 gün ərzində başa çatdırılması planlaşdırılır.
Çində istehsal edilərək sınaqdan keçirilmiş zirehli optik kabel əvvəlcə Kurık limanına, daha sonra isə Bakıya gətirilib. Hazırda kabel tam şəkildə kabel çəkən gəminin göyərtəsində yerləşən xüsusi rezervuara yüklənib.
Layihə çərçivəsində 20 min tondan çox su tutumuna malik, dinamik mövqeləndirmə sistemi ilə təchiz olunmuş ixtisaslaşdırılmış gəmi istifadə olunur. Gəmidə 70 heyət üzvü, texniki nəzarət mütəxəssisləri və “Kazakhtelecom”un nümayəndəsi fəaliyyət göstərir.
Layihə Qazaxıstanın “Kazakhtelecom” SC və Azərbaycanın “AzerTelecom International” şirkətinin birgə yaratdığı “CaspiLink B.V.” tərəfindən icra edilir. Kabelin Azərbaycan və Qazaxıstan hissələri artıq birləşdirilib və bütün optik xətlər sınaqdan keçirilib.
Mütəxəssislər marşrutu əvvəlcədən müəyyənləşdirərək mühəndislik araşdırmaları aparıb, ekoloji icazələr alıb və kabel xəttini lövbər dayanacaqları ilə hərbi təlim zonalarından kənar keçəcək şəkildə planlaşdırıblar.
Transxəzər Fiber-Optik Kabel Xəttinin 2026-cı ilin sonunadək istismara verilməsi nəzərdə tutulur.
