ABŞ-nin Yuta ştatında 1985-ci ildə qətldə təqsirli bilinərək ölüm cəzasına məhkum edilən Duqlas Stüart Karter girov müqabilində azadlığa buraxılacaq. Buna səbəb onun DNT nəticələrinin hadisə yerindən götürülmüş nümunələrlə uyğun gəlməməsidir.
Karter Provo şəhərində Eva Olesenin qətlində təqsirləndirilib. Cinayət yerində onun iştirakını təsdiqləyən maddi sübut tapılmasa da, məhkəmə onun etirafına və qətl barədə danışdığını bildirən iki şahidin ifadəsinə əsasən ölüm hökmü çıxarıb. Həmin şahidlər daha sonra ifadələrini geri götürüblər.
Yuta ştatının Ali Məhkəməsi 2025-ci ildə müstəntiqlərin qanunsuz hərəkətləri ilə bağlı cinayət işinin yenidən araşdırılmasına qərar verib. Karter isə təzyiq və hədə-qorxu nəticəsində törətmədiyi cinayəti etiraf etməyə məcbur edildiyini bildirib.
Bununla yanaşı, qətlə yetirilən qadının gəlininin sözlərinə görə, DNT nəticələrinin fərqli olması Karterin hadisə yerində olmadığını birmənalı şəkildə sübut etmir. Olesen ailəsi istintaqın davam etdirilməsini istəyir.
