ABŞ-də 16 ildən sonra ilk dəfə bir gün ərzində üç məhbus barəsində ölüm hökmü icra edilib.
Avqustun 13-də Tennessi, Alabama və Oklahoma ştatlarında üç məhbusın edamı həyata keçirilib. Bu, 2009-cu ildən bəri ölkədə bir gün ərzində üç edamın ilk dəfə baş verməsidir.
Alabamada 2021-ci ildə 5 yaşlı qızı zorlayaraq öldürməkdə təqsirli bilinən Ceremi Uilyams edam edilib. Oklahomada 2003-cü ildə sevgilisi Olimpiya Fişeri öldürməkdə məhkum olunan Karlos Kuesta Rodriqes barəsində ölüm hökmü icra olunub.
Tennessidə isə 1985-ci ildə xadiməni öldürməkdə təqsirli bilinən Entoni Darrell Hayns edam edilib.
“Associated Press”in məlumatına görə, bir gündə üç edamın həyata keçirilməsi ABŞ-də ölüm hökmlərinin icrasının artdığını göstərir. 2025-ci ildə ölkədə 47 nəfər edam edilib ki, bu da 2009-cu ildən bəri ən yüksək göstəricidir.
ABŞ-də ölüm hökmünün tətbiqi ştatlara görə fərqlənir və edamların icrası federal səviyyədən daha çox ayrı-ayrı ştatların qanunvericiliyi əsasında həyata keçirilir.
